सुन तस्करी प्रकरणलाई लिएर जिल्ला सरकारी वकिलको कार्यालय काठमाडौंले त्रिभुवन अन्तर्राष्ट्रिय विमानस्थल भन्सार कार्यालयका कर्मचारीहरूमाथि छानबिन गर्न अख्तियार दुरुपयोग अनुसन्धान आयोगलाई पत्र लेखेको छ ।
विमानस्थल भन्सार कार्यालयका प्रमुखसहित सबै कर्मचारीमाथि छानबिन गर्न आयोगलाई पत्राचार गरिएको जिल्ला सरकारी वकिल कार्यालय काठमाडौंका प्रवक्ता महेश खत्रीले जानकारी दिए ।
“सुन तस्करी सहजरूपमा भइरहेको देखियो । यस्तो अवस्थामा तस्करीमा संलग्न भएको आरोपमा पक्राउ परेकाबाहेकका कर्मचारीलाई पनि अनुसन्धान गर्न जरुरी देखियो,” प्रवक्ता खत्रीले भने, “त्यही कारण हामीले प्रमुखदेखि सबै कर्मचारीमाथि छानबिन गर्न अख्तियारलाई पत्राचार गरेका हौँ ।”
